ප්‍රාදේශීය ලේකම් කාර්යාලය - මැදගම

භූවිෂමතාව

හුදකලා කඳු රාශියකින් සමන්විත මැදගම ප්‍රාදේශීය ලේකම් කොට්ඨාශය මුහුදු මට්ටමේ සිට අඩි 500-2500 ත් අතර භූ විෂමතා පරාසයක විහිදී යයි.කොට්ඨාශයේ බටහිර සීමාවට, උතුරින් හා දකුණින් විහිදී ඇති කඳු පන්ති මායිම් වේ. අඩි 1500 – 2500 දක්වා උසකින් යුත් කඳු පන්ති V හැඩ නිමි ,නෙරු සහිත  දළ බෑවුමකින් යුක්ත වේ.සමස්තයක් ලෙස තැනිතලා බිම් මෙන්ම කඳුකර භූ විෂමතා ලක්ෂණද දක්නට ලැබෙන මෙහි කඳුකර කලාපයට අයත් ග්‍රාම නිලධාරී වසම් ලෙස සේනාපතිය, බිබිලමුල්ල, කොහුකුඹුර, නුගහමුර, ඇල්ලේකෝණ,

ඇල්හේන පිටදෙණිය, කින්නරබෝව හඳුන්වාදිය හැකිය. කොට්ඨාශයේ උසින්ම යුක්ත ත්‍රිකෝණමිතික ස්ථානය ඇල්හේන වසමේ පිහිටා ඇත. එහි උස අඩි 2850 ක් වේ. අඩි 1000 - 2500 ත් අතර පිහිටි හුදකලා කඳු කිහිපයකි. ගිරාපොල (2227), ගෝනිදෝව (2388) ඒ අතර ප්‍රධාන වේ. මැදගම කොට්ඨාශයේ බෑවුම් කළාප සැලකීමේදී නිරීක්ෂණය කළ හැකි විශේෂ කරුණක් වන්නේ මුළු භූමි ප්‍රමාණයෙන් 60% ක් පමණම තැනිතලා බවින් යුක්ත වීමයි. එනම් 0-8% ක බෑවුම් පරාසයකින් යුතුය. මුළු කොට්ඨාශය   සැලකීමේදී බැවුම් පරාසය 0-8% , 8-16%, 16-32% ,32-60% හා 60% වැඩි ආදී වශයෙන් පෙන්වා දිය හැකිය. මෙහි 60% ට වැඩි බෑවුම් පරාසය බිබිලමුල්ල, කොහුකුඹුර, නුගාමුර, ඇල්ලේකෝණ, බැදියාව, කින්නරබෝව, තඹාන, කළුගහවාඩිය යන ග්‍රාම නිලධාරී වසම් වල දක්නට ඇත.

මැදගම කොට්ඨාශයට අයත් භූමියේ පාංශු ව්‍යාප්තිය සම්බන්ධව සැලකීමේදී 90% ක් පමණම රතු දුඹුරු පස ව්‍යාප්තව පවතී. එනම් වාර්ෂික මෙන්ම බහු වාර්ෂික බෝග වගාවන් සඳහා යෝග්‍ය පංශු ව්‍යාප්තියක් ලෙස හඳුනාගත හැක. රතු දුඹුරු පසෙහි ප්‍රධාන කාණ්ඩ දෙකට  අමතරව ගංගා ආශ්‍රිතව දියළු පස හා කඳු බෑවුම් ආශ්‍රිතව ඛාදනයට භාජනය වූ පස් සහිත ප්‍රදේශද සාපේක්ෂව සුළු වශයෙන් පිහිටා ඇත.  රතු දුඹුරු පස හා අඩු හියුමස් සහිත ඇලෙන පස 45%ක් ද,රතු දුඹුරු පස හා නොමේරූ දුඹුරු ලොම් පස 45% ක් ද විවිධ ජල වගාවන් යුත් 5% ක් වශයෙන්ද කොට්ඨාශයේ ඛාදනයට භාජනය වූ පස් සහිත ප්‍රදේශ  5% ක් වශයෙන් ද කොට්ඨාශය ආවරණය වන පාංශු කාණ්ඩ ව්‍යාප්තිය පිළිබඳව සඳහන් කළ හැකිය.